Tiong-hôa su-sióng

Tiong-hôa su-sióng (中華思想), he̍k-chiá Hôa-î chi piān (華夷之辨), Î-hā chi piān (夷夏之辨), Î Hā chi hông (夷夏之防), Î Hā tāi-hông (夷夏大防), sī kó͘-chá-lâng the̍h-lâi hun-piān Hôa-hā kap Bân-î ê chi̍t chióng kài-liām. Chit-ê kài-liām jīm-ûi kó͘-chá ê Hôa-hā-cho̍k tòa tī Tiong-goân, sī bûn-bêng ê tiong-sim; in-chhú, chiām-chiām sán-seng chhut lī-iōng Hôa-hā lé-sò͘ chò-ûi piau-chún, lâi chìn-hêng cho̍k-kûn hun-piān ê koan-liām. Ha̍p-tī Hôa-hā lé-sò͘ ê kûn-thè, chiū-sī "Tiong-kok-lâng"; bô ha̍p-tī ê, chiū pī kui-lūi chò "hòa gōa chi bîn" (化外之民). Sù-î tāi-lio̍k pī hun-chò Tong-î, Lâm-bân, Se-liông kap Pak-te̍k; le̍k-sú siōng ê tiōng-iàu Bân-î ū Sián-pi, Sa-tô, Lú-chin, Khè-tan kap Bông-kó͘. Kīn-tāi Hàn-jī Bûn-hòa-khoan kok-ka ê se-hong-hòa oa̍h-tāng pī Tiong-kok-lâng jīm-tēng sī khì-Tiong-kok-hòa.