Pang-chān:獅球嶺炮臺

獅球嶺炮臺（英語：Shihciouling / Shih-chio-ling Fort）是位佇臺灣基隆市仁愛區獅球嶺兮一个炮臺遺蹟。這个炮臺是佇清領時代起兮，目前是基隆市兮市定古蹟。

歷史

獅球嶺砲臺兮砲座

獅球嶺炮臺位佇臺灣東北，嘛是日本菲律賓航線兮中央，往來兮船隻攏愛佇遮運補。所以自十七世紀以來，逐个政權西班牙、荷蘭、東寧、清朝、日本佮中華民國攏意識著獅球嶺砲臺兮重要，並且起防禦建設。

清領時代

光緒時代進前，基隆兮砲臺攏是為著應付敵人兮攻擊，光緒元年（1875年）受著洋務運動推行兮風潮影響，閣有清國受著日本入侵兮刺激，對臺灣軍事規劃改做「起洋式砲臺」，獅球嶺砲臺佇清光緒十年（1884年）開始起，傳說是清國巡撫劉銘傳為著防禦法軍，請英國兮技師來起炮臺，嘛是清國守護基隆通往臺北兮上尾一道防線。

仝年（1884年），清國佮法國因為越南兮問題，爆發清法戰爭。法國為著莫予戰線傷長，著改做以福建海域做主要戰場。福州、基隆著自按呢變成主要戰場。彼當陣清國著予劉銘傳親自前往監督，佇獅球嶺指揮，攻擊法軍。法軍共獅球嶺炮臺拍落來以後清軍欲反攻攏無成功，落尾是甲法國佮清國簽條約才離開。

日本時代

獅球嶺砲臺兮石造指揮所

甲午戰爭了後，光緒二十一年3月23（1895年4月17），清國佮日本簽訂馬關條約，共福建臺灣省割予日本。因為馬關條約進前佮當地軍民無共識，所以佇4月29（1895年5月23）臺灣發表〈臺灣民主國自主宣言〉，成立臺灣民主國軍隊，乙未抗日戰爭開始。清國進前佇基隆港建立兮防守設施自然著變成守軍抗日兮靠山。毋過日軍選佇貢寮登陸，閃開守軍佇基隆港兮主力，予當時大部份兮砲臺無法度發揮原本按算兮戰力。干焦有獅球嶺砲臺，拄仔好對著日軍登陸兮所在攻擊日軍，予日軍進攻失利。

1934年到1945年，獅球嶺兮火力有一寡變動，予伊會使達著海防兮需求。 另外，佇日露戰爭當中，日本嘛有特別加強佇基隆兮逐个炮臺，防止露西亞攻擊臺灣。

戰後

獅球嶺砲臺沓沓仔荒廢，失去軍事功能，目前干焦賰石造指揮所、砲座佮彈藥庫等幾若个遺跡，1985年8月19，獅球嶺砲臺夆指定做第二級古蹟，以後閣改做市定古蹟，因為視野足闊，近年獅球嶺砲臺附近嘛開發變做公園，已經成做民眾𨑨迌兮景點之一。

地理位置

• 
  獅球嶺炮臺看出去兮基隆市區

獅球嶺砲臺懸150公尺，位佇基隆港南方，中山高速公路大業磅空頂懸，因為地勢較懸而且閣佇內陸，成做基隆港兮重要防線，佇遮會使看著規个基隆市區，上遠閣看會著基隆嶼，會使有效掌握規个港區船隻出入佮振動兮狀況，前往砲臺會使開車對中山高速公路上北，出基隆交流道了後，正斡忠四路直直行，閣正斡成功路，過成功路橋以後正斡著到矣。

設施

獅球嶺砲臺會當分做西、中、東三兮區域。今 (taⁿ)古蹟保存範圍是以中炮臺為主，西砲臺佮東炮臺著沕佇雜草內，基隆市政府過去捌制定過整修計畫，希望會使較緊予炮臺恢復伊原本兮模樣，附近地區嘛有戰後興建、毋過目前已經荒廢兮防空壕佮炮壘。

中炮臺

中炮臺這馬干焦賰一座砲座、彈藥庫佮石造指揮所，主要兮材質攏是砂岩。

西炮臺

西炮臺位佇離中炮臺2公里兮山頂，有留落來紅毛塗炮壘、彈藥庫、小型營舍、佮一个砲盤遺跡，目前部分區域予雜草閘咧。佇平安宮附近有湘軍之墓，佮西炮臺略仔無仝兮砲盤佮庫房遺跡。

東炮臺

東炮臺位佇獅球嶺山東爿，大業磅空偏東兮山坡頂懸，佇文獻當中法軍共叫做鷹巢炮臺，伊兮營舍形式含大細攏佮中炮臺營舍非常倚近，目前兮遺跡干焦賰石造庫房大門、砲盤、彈藥庫佮觀測炮壘，這馬全部攏予雜草閘咧，保存程度較䆀。

閣看

• 基隆要塞
• 二沙灣炮臺
• 頂石閣炮臺
• 社寮東炮臺

外部連結

• 行政院農業委員會水土保持局：獅球嶺步道（劉銘傳隧道）
• 國家文化資產網：獅球嶺砲台 Ia̍h-bīn chûn-àn pī-hūn
• 國家圖書館 臺灣記憶：基隆市市定古蹟：獅球嶺砲臺調查研究與修復計畫
• 基隆旅遊網：獅球嶺砲台 Ia̍h-bīn chûn-àn pī-hūn