921 tōa tē-tāng
| 這篇文章有漢字兮版本。 參考這篇文章兮漢字版本。 |
921 Tōa Tē-tāng (921大地動), he̍k-chiá 921 Tāi Tē-chìn (921大地震) kap Chi̍p-chi̍p Tāi Tē-chìn (集集大地震), sī 1999 nî 9 goe̍h 21 hō hoat-seng tī Tâi-oân tiong-pō͘ soaⁿ-khu ê ge̍k-toān-chân tē-tāng. Chìn-iong ūi-tī Pak-hūi 23.85 tō͘, Tong-keng 120.82 tō͘, tī Lâm-tâu-koān ê Chi̍p-chi̍p-tìn kéng-lāi. Chìn-goân chhim-tō͘ 8.0 kong-lí; Richter kui-bô͘ 7.3. Chit tiûⁿ tē-tāng chō-sêng Tâi-oân pún-tó lóng kám-siū tio̍h ke̍k-lia̍t koh giâm-tiōng ê iâu-tōng, chêng-āu le̍k-sî 102 bió; sī Tâi-oân chiàn-āu siong-bông sún-sit siōng-tōa ê thian-chai. 921 lóng-chóng chō-sêng 2,415 lâng sí-bông, 29 lâng sit-chong, 11,305 lâng tio̍h-siong, 51,711 keng pâng-chhù choân-tò, 53,768 keng poàn-tó.
