Chióng-lē Tâu-chu Tiâu-lē

Chióng-lē Tâu-chu Tiâu-lē (獎勵投資條例) sī Tiong-hôa Bîn-kok Chèng-hú tī 1960 nî chì 1990 nî ūi-tio̍h chióng-lē tâu-chu, ka-sok keng-chè hoat-tián só͘ si̍t-si ê hoat-lu̍t. 1960 nî 8 goe̍h 31 hō Li̍p-hoat-īⁿ chè-tēng; 1991 nî 1 goe̍h chhe 1 Hêng-chèng-īⁿ kong-kò hòe-chí. Kî-tiong, tī 1960 nî ê sî ūi-tio̍h in-èng Bí-oān thêng-chí liáu-āu ê keng-chè hoat-tián, chèng-hú tī 19 tiám châi-keng kái-kek chhò͘-si tiong iau-kiû Tâi-oân ē-tàng ta̍t-sêng chū-kip-chū-chiok ê thêng-tō͘. Tī chèng-hú khak-li̍p liáu chìn-kháu thè-tāi kang-gia̍p-hòa chèng-chhek liáu-āu, tī kai-tōaⁿ āu-kî chè-tēng pún tiâu-lē lâi chióng-lē pau-hâm chè-chō-gia̍p, chhiú-kang-gia̍p, khòng-gia̍p, lông-lîm-hî-thiok-gia̍p, ūn-su-gia̍p téng, chú-iàu bo̍k-tek sī beh thê-ko Tâi-oân ê sán-phín chū-chè-lu̍t.

Tông-sî, in-ūi chèng-hú mā biān-lîm châi-chèng khùn-lân, gōa-hōe toán-khoat kap sit-gia̍p-lu̍t phian koân ê būn-tê, in-chhú mā chioh tio̍h pún tiâu-lē hoat-tián gōa-siau sán-gia̍p, pēng-chhiáⁿ í kiám-bián cho͘-sòe ê hong-sek lâi khip-ín gōa-chu lâi Tâi. Tī keng-chè hoat-tián chèng-chhek choán chò chhut-kháu khok-tiong hong-chiam liáu-āu, pún tiâu-lē mā tòe leh siu-chèng lâi ka-sok chu-pún chiat-kū pēng-chhiáⁿ kó͘-lē kó͘-phiò chiūⁿ-chhī. 1980 nî chì 1990 nî ê tē-jī chhù chìn-kháu thè-tāi sî-kî pún tiâu-lē chài-chhù siu-chèng, hoat-tián chhek-lio̍k-sèng kang-gia̍p, pēng-chhiáⁿ kó͘-lē khì-gia̍p chhî-sio̍k lâu tī Tâi-oân.