Hia̍p-tēng Sè-kài-sî

Hia̍p-tēng Sè-kài-sî (協定世界時, Eng-gí: Coordinated Universal Time) mā thang kiò chò Hia̍p-tiau Sè-kài-sî (協調世界時), Sè-kài Hia̍p-tiau-sî (世界協調時), ia̍h-sī Sè-kài Hia̍p-tiau Sî-kan (世界協調時間), sī 1-khoán Sè-kài-sî (UT) ê phiau-chún. I ê kán-chheng sī UTC, "C" piáu-ta̍t i sī "hia̍p-tiau"--kòe ê sî-kan. Choân sè-kài ê sî-khu ē-iōng-tit siá chò UTC ê "chha-ta̍t". Chá-chêng ê Greenwich Piau-chún-sî (GMT) sī kin-kì thian-thé ūn-tōng lâi kè-sǹg sî-kan, āu--lâi ê UTC sī àn-chiàu goân-chú-cheng ê phiau-chún tit-tio̍h ê. Thong-sio̍k oē-gí ū-sî lia̍h GMT sī UTC ê tông-gī-sû.

UTC kap kok-chè goân-chú-sî (TAI) oân-ná ū chha-pia̍t, chha kúi-nā-ê chéng-sò͘ ê bió-cheng. UTC ê ta̍t su-iàu lâng cheng-ka (a̍h-sī kiám-chió) tām-po̍h-á, hō͘ i bē phian-lî UT1 0.9 bió khah chē. Múi-tang ê 6 go̍eh 30 kap 12 go̍eh 31 ê pòaⁿ-mî ōe lâi chim-chiok khòaⁿ beh tiâu-chéng--bô. 1-kái sī tiâu-chéng 1-bió-cheng, hō-chò lūn-bió. Chêng-kàu-taⁿ m̄-bat kiám--kè, lóng sī ēng ka--ê. Tī 1972 nî ê sî UTC kap TAI ê cheng-chha tēng-gī chò 10 bió, hiān-chú-sî í-keng chha 33 bió ah.