Hoán-chèng-hoat

Hoán-chèng-hoat (reductio ad absurdum) sī 1 chióng lô-chek lūn-chèng ê chhiú-lō͘, thaû-khí-seng ká-siat beh lūn-chèng ê tîn-su̍t sī ké--ê, soà--lo̍h ê chèng-bêng nā tit tio̍h sio-ta̍h-thut ê kiat-kó, tō piáu-sī chìn-chêng ê ká-siat m̄-tio̍h, chèng-bêng kiat-sok. Chit chióng chhiú-lō͘ ēng tio̍h hui-maû-tún-lu̍t (law of non-contradiction), khiā kóng 1 ê tîn-su̍t bē-tàng sī chin--ê iū-koh sī ké--ê. Ū-tang-sî-á mā ē ēng tio̍h pâi-tiong-lu̍t, khiā kóng 1 ê tîn-su̍t nā bē-tàng sī ké--ê, tō tiāⁿ-tio̍h sī chin--ê.

Lē

Ēng hoán-chèng-hoat lâi chèng-bêng sò͘-sò͘ ê sò͘-liōng bû-hān.

Tē 1 pō͘: Seng ká-siat sò͘-sò͘ ê sò͘-liōng iú-hān, kan-taⁿ ū m ê.

Tē 2 pō͘: Kā chit m ê sò͘-sò͘ sio sêng chò-hoé koh ke 1, kā hō chò x. Án-ne chit m ê sò͘-sò͘ khì tû x lóng ē chhun 1. Án-ne nā m̄ sī (a) x sī sò͘-sò͘; tō sī (b) x ū 1 ê bô tī chit m ê sò͘-sò͘ lāi-té ê iok-sò͘. M̄-koh (a) ham (b) lóng piáu-sī sò͘-sò͘ siōng-bô ū m + 1 ê, che kap ká-siat maû-tún.

Kin-kì hoán-chèng-hoat, sò͘-sò͘ ê sò͘-liōng m̄ sī iú-hān--ê. #