Seng-lí-ha̍k kóng ê ho͘-khip (Eng-gí: respiration) sī tēng-gī chò kā gōa-kháu khoân-kéng ê sng-sò͘ sàng ji̍p cho͘-chit lāi-té ê sè-pau, kiam tò-péng hong-hiòng sàng chhut jī-sng-hòa thòaⁿ-sò͘ ê kòe-têng.

Seng-lí-ha̍k ê ho͘-khip tùi seng-hòa-ha̍k chân-kip ê sè-pau ho͘-khip lâi kóng sī pì-iàu--ê, chóng-sī in nn̄g-ê sī bô kâng ê kòe-têng. Sè-pau ho͘-khip sī hoat-seng tī kò-pia̍t sè-pau lāi-bīn, seng-lí-ha̍k ê ho͘-khip sī hoat-seng tī kui-ê kò-thé sin-thé ê kòe-têng.