Im-koân khiuⁿ-kháu

Im-koân khiuⁿ-kháu (Eng-gí: pitch accent) sī chi̍t khoán giân-gí ê sû-lūi hông kóng--chhut-lâi ê sî sán-seng ê im-koân piàn-hòa siōng ê chha-pia̍t. I siaⁿ-im siōng ê sèng-chi̍t kap siaⁿ-tiāu sio-kâng, m̄-koh sī chiàu im-chat tī tan-gí lāi-bīn ê ūi-tì koat-tēng--ê, bô chhiūⁿ siaⁿ-tiāu giân-gí kò-pia̍t im-chat ū pún-sin siaⁿ-tiāu.

Sǹg sī im-koân khiuⁿ-kháu ê giân-gí pau-koat Ji̍t-gí, Hân-gí, Siōng-hái-ōe, chi̍t kóa Scandinavia giân-gí kap Lâm Slav giân-gí téng chióng.