Jī-bó-hē

Chi̍t-ê jī-bó-hē (Ji̍t-gí: 字母系; Eng-gí: alphabet) ia̍h jī-bú-hē, sī chi̍t thò jī-bó, sī siá bûn-jī ê chi̍t cho͘ hû-hō. Giâm-keh ì-sù ê jī-bó-hē hē-thóng ū khu-hun bó-im kap chú-im nn̄g-khoán im-sò͘, si̍t-lē ū Lô-má-jī, Hi-lia̍p-jī, Tiâu-sián-jī téng khoán. Chóng-sī kî-tha pheng-im hêng-sek ê siá-jī hē-thóng tan-goân mā tiāⁿ-tiāⁿ hō chò "jī-bó".

Iōng-gí

Nā chiàu ha̍k-chiá Peter T. Daniels tùi Eng-gí alphabet chit jī só͘ tēng ê ì-sù, jī-bó-hē sī pêng-téng piáu-hiān chú-im kap bó-im ê bûn-jī. Nā Hi-lia̍p-jī kap Lô-má-jī ū ha̍h pún khoán tēng-gī. Kî-tha chhiūⁿ goân-sú ê Phoenicia, Hi-pek-lâi ia̍h A-la-pek bûn-jī, lóng sī piáu-hiān chú-im ûi chú ê abjad hêng-sek. Lēng-gōa koh ū chi̍t khoán sī abugida, chhan-chhiūⁿ Devanagari bûn-jī, sī ēng chú-im chò ki-chhó͘, lī-ēng phiat-im hû-hō ia̍h siu-kái pit-ōe leh piáu-hiān bó-im.

Le̍k-sú

Goân-chho͘ Canaan bûn-jī, mā hō chò Phoenicia bûn-jī, sī só͘ chai-iáⁿ siāng kó͘ ê chi̍t khoán choân im-sò͘ bûn-jī. Phoenicia jī sī tōa-pō͘-hūn hiān-tāi jī-bó-hē ê sian-chó͘, tùi i hoat-tián chhut--lâi ê bûn-jī hē-thóng pau-koat A-la-pek-jī, Hi-lia̍p-jī, Latin-jī (Lô-má-jī), Kyril-jī, Hi-pek-lâi-jī, mā khó-lêng hâm Brahmi-jī.