Tâi-oân Chheng-liân Siā
Tâi-oân Chheng-liân Siā (台灣青年社) sī Bêng-tī Tāi-ha̍k káng-su kiam chok-ka Ông Io̍k-tek tī Ji̍t-pún sêng-li̍p ê chèng-tī thoân-thé. 1959 nî, Ông Io̍k-tek tam-jīm Tâi-oân cha̍p-chì ê chú-pit āu, kap Ngô͘ Ki-chiong (吳枝鐘), Tiuⁿ Chhun-heng (張春興), Lîm Khé-hiok (林啓旭), Lí Goân-lîm (李元琳) téng lâng sêng-li̍p Tâi-oân-siā[1] (hām 2006 nî sêng-li̍p ê Tâi-oân-siā pēng bô koan-liân). Khai-sí chìn-hêng tùi liû-ha̍k Ji̍t-pún ê Tâi-oân ha̍k-seng ê khé-bông kang-chok í-ki̍p tùi Ji̍t-pún-lâng ê kok-chè soan-thoân kang-chok; iā tián-khui Jī-chhù Tāi-chiàn āu ê Tâi-oân to̍k-li̍p ūn-tōng, hoat-hêng Ji̍t-bûn siang-goe̍h-khan Tâi-oân Chheng-liân lâi chò soan-thoân. Bô-gōa-kú, Khó͘ Sè-khái, Tiuⁿ Kok-heng (張國興), Chiu Eng-bêng (周英明), Kim Bí-lêng, Lîm Khé-hiok, Hâu Êng-pang (侯榮邦) téng Tâi-oân liû-ha̍k-seng ta̍uh-ta̍uh ka-ji̍p. 1960 nî 2 goe̍h 28 hō, Tâi-oân-siā kái-miâ chò Tâi-oân Chheng-liân Siā.
1962 nî, Tâi-oân Chheng-liân Siā hoat-hêng koaⁿ-hong khan-bu̍t To̍k-li̍p Thong-sìn, tián-khui tī Tâi-oân lāi-pō͘ ê khé-bông soan-thoân. 1963 nî 5 goe̍h, Tâi-oân Chheng-liân Siā kái-miâ chò Tâi-oân Chheng-liân Hōe (台灣青年會), tián-khui cho͘-chit liû-ha̍k-seng ūn-tōng. 1965 nî 9 goe̍h 23 hō, Ông Io̍k-tek, N̂g Chiau-tông, Khó͘ Sè-khái, Chiu Eng-bêng, Kim Bí-lêng, Liāu Chhun-êng (廖春榮) téng lâng kā Tâi-oân Chheng-liân Hōe hoat-tián chò Tâi-ôan Chheng-liân To̍k-li̍p Liân-bêng, koh hoat-piáu kong-niá. 1965 nî 9 goe̍h 24 hō, Tâi-oân Chheng-liân To̍k-li̍p Liân-bêng tī Tang-kiaⁿ-to͘ Gîn-chō hoat-tōng sī-ui, iau-kiû Liân-ha̍p-kok chi-chhî Tâi-oân chū-koat. Khu Éng-hàn (邱永漢), Ko͘ Khoan-bín (辜寬敏) ka-ji̍p āu, Tâi-ôan Chheng-liân To̍k-li̍p Liân-bêng koh khok-tāi cho͘-chit. 1970 nî 1 goe̍h 1 hō, Tâi-oân Chheng-liân To̍k-li̍p Liân-bêng pèng-ji̍p Tâi-to̍k Liân-bêng.
Siong-koan
siu-káiChham-khó
siu-kái- ↑ わたし達の青春は勇敢な歌 許千恵（台湾）２００２年８月３日 Archived 2012-02-17 at the Wayback Machine.