Tân Éng-tô

Tân Éng-tô (陳永淘, Kheh-oē Chhṳ̀n Yún-thò), sù-siông kiò chò "Â-thò" (阿淘), sī Tâi-oân ê 1 ê gē-su̍t-ka, koa-iâu chhòng-chok-ka kiam koa-chhiú. I choan-tô͘ chhòng-chok hiān-tāi Kheh-gí koa. Chú-iàu ê ga̍k-khì sī gí-tah.

Toān-kì

Tân Éng-tô chhut-sì tī Sin-tek-koān Koan-se-hiong (關西鄉) ê Lâm-mn̂g-khàm-ē (南門崁下). Chng-kha oá-kīn tāi-chū-jiân ê chit khoán khoân-kéng āu--lâi pìⁿ chò i chhòng-chok "Theù-pái ke Sṳ-chhìn" (Éng-koè ê Tāi-chì) ê choâⁿ-thâu. 13 hoè sî, toè lāu-pē lī-khui kò͘-hiong khì kah Tâi-pak. Chheng-siàu-liân ê Éng-tô kèng-ka bô chhù-bī tha̍k-chheh. Kin-kù i ê bāng-chām, "Ko-tiong sî-chūn khai-sí sńg gí-tah, bat chhut-khì-liû, mā bat hông thoè-o̍h." Ū 1-chām-á tiàm soaⁿ-po͘ koè seng-oa̍h. Ko-tiong tông-téng ha̍k-le̍k khó tiâu liáu-āu tō khì chò-peng; kun-tiong mî-noā liān gí-tah ê kang-hu.

Thoè-ngó͘ liáu-āu khó tiâu Sè-sin Tāi-ha̍k tiān-iáⁿ pian-tō (編導) iā-kan-pō͘, ji̍t--sî tiàm Iá-goā Cha̍p-chì chò khì-e̍k kap pian-chi̍p ê khang-khoè. Bat toè koè Tēⁿ Bêng-lêng (鄭明能) kàu-siū tī pak-pō͘ soaⁿ-khu gián-kiù seng-thài. Ū kiat koè hun m̄-koh hun-in sit-pāi. Āu-lâi oāⁿ koè kî-thaⁿ ê thâu-lō͘, chóng--sī lâng ná lâi ná bô goân-khì, tō kā 3 ê thâu-lō͘ lóng sî-tiāu, lī-khui to͘-chhī, tò khì koè chū-iû ê ji̍t-chí. I khì kah Tâi-pak-koān Sam-chi-hiong ê 1 ūi kiông beh pha-hng ê só͘-chāi, khai-sí kioh lâng tàn hìⁿ-sak ê hāi mi̍h-á lâi kái chò gē-su̍t-phín, kang-chok-sek hō "Kim-sio̍k Kái-hòng", chiân-āu 7~8 tang kú. Hit ê khám-chām, pē-bó, a-kong oan-ná poaⁿ khì hia toà.

1996 nî, a-kong phoà-pēⁿ, Tân Éng-tô ūi beh hō͘ a-kong hoaⁿ-hí, tō gia̍h peng-iú Kiuⁿ Ióng (姜勇) sàng ê gí-tah khai-sí chhòng-chok Kheh-oē koa. Āu--lâi ê chi̍t-koá chhòng-chok ū siū tio̍h pêng-iú khéng-tēng, i tō tò khì Tâi-pak, chiah koh tùi hia hoan-thâu tńg khì Sin-tek, tiàm hia sì-kè cháu-chhiùⁿ.

Tân Éng-tô choè-kīn kúi nî tiàm Sin-tek chháu-tē khiā-khí, hē chin chē cheng-sîn chò tē-hng ê khoân-pó khang-khoè, bat tam-jīm (峨眉) Aì-hiong Hia̍p-chìn-hoē ê chóng-kàn-sū [1]

Im-ga̍k chok-phín

頭擺的事情 (1997)
離開台灣八百米阿淘的歌 (2000)
阿淘和孩子一起下課啦 (2000)
水路 (2003)

Goā-pō͘ liân-kiat

Kū koaⁿ-hong chām (archive.org ê khò͘-chûn)
Choan-chip Archived 2007-03-10 at the Wayback Machine.