Tiân-cheng
| ?Tiân-cheng | ||||||||||||||||||
|---|---|---|---|---|---|---|---|---|---|---|---|---|---|---|---|---|---|---|
| ||||||||||||||||||
| Seng-bu̍t-ha̍k hun-lūi | ||||||||||||||||||
| ||||||||||||||||||
| Ha̍k-miâ | ||||||||||||||||||
| Sesbania cannabina |
Tiân-cheng (Hàn-jī: 田菁, ha̍k-miâ: Sesbania cannabina) kui-sio̍k-tī tāu-kho, sī chi̍t-nî-seng chháu-pún he̍k to-nî-seng bo̍k-pún si̍t-bu̍t. Goân-pún seⁿ tī jia̍t-tāi kap a-jia̍t-tāi, ū ê kóng sī Egypt, Tâi-oân tī 1930 nî-tāi ín-chìn chai-poê, sī chhân--lin tiāⁿ-khoàiⁿ ê le̍k-pûi si̍t-bu̍t. I hun-pō· tī pêⁿ-tē kàu kē-hái-poa̍t ê soaⁿ-khu, seng-tióng tī khòng-khoah ê pha-hng-tē. I kah-ì kui-kang ū-ji̍t ê khoân-kéng, hoe-kî sī 6 goe̍h kàu 12 goe̍h.
Hêng-thài
siu-káiKeng ê ki-pō· bo̍k-chit-hoà, iù-ki seⁿ tn̂g-mo·. Koân tāi-iok 1 kàu 2 kong-chhioh.
Hio̍h-á sī it-hoê ngó·-sò· ú-chōng ho̍k-hio̍h, tn̂g 12 kàu 15 kong-hun, sió-hio̍h tn̂g 4 kàu 8 mm, tn̂g thó-îⁿ-hêng, thâu-chêng hit-toan tūn-tūn, ki-pō· chhoa̍h-chhoa̍h. Sió-hio̍h sò·-liōng tāi-hūn chhiau-koè 20 tùi.
Hoe n̂g-sek, ô·-tia̍p-hêng hoe-koan, 1 lúi kàu 3 lúi seⁿ tī hio̍h-á ê koh-ē-lang (e̍k-seng), chóng-chōng hoe-sū.