Thó-lūn:Thih-koan-im

鐵觀音

鐵觀音的茶米佮茶湯

鐵觀音是一款茶米，上早出現佇福建泉州安溪縣，做出來的茶心，結成細細粒，一丸仔一丸，略仔有尾溜，有人講看著親像田嬰的頭，又閣親像肚胿仔 (蛤蛙仔，蝌蚪)的尾溜，茶泡好勢了後，予人一種"青葉khong âng-kîⁿ"的感覺，鐵觀音是烏龍茶的珍品。

鐵觀音的奇妙

---

鐵觀音的做茶手藝有較複雜，成品茶的茶心加真飽粒、束結，茶的色緻嘛真正青，又閣烏金，好茶佇咧做茶的中間遐的咖啡鹼會隨著水份蒸發，茶心就會出現一層白白薄薄的霜，用滾水沖泡過後，連鞭會當鼻著一款若存天然蘭花的芳味，彼種美妙的感覺，實在予人呵咾甲會觸舌！泡茶上好愛kèng束結又閣古錐的茶具，食茶先愛鼻茶芳，鐵觀音茶啉過了後，真純、真甘甜，予人放袂離，近年來實際表明烏龍茶會當增加健身佮美容的功效，尤其得著日本佮東南亞民眾的喜愛。

功夫茶

---

鐵觀音是烏龍茶的珍貴品種，茶葉一年四季挽四擺，按年頭的雨水到佮立夏這段時間採收的茶，號做春茶，毋但產量懸(占全年產量50% )，品質嘛上蓋好，安溪鐵觀音的製作工藝愛經過下跤這幾項步驟：吹風 → 曝日 → 閣吹風 → 起酵→ 炒青 → 撋茶 → 頭遍烘 → 二遍烘 → 閣撋 → 勻火炰 → 揀茶，食茶的方式，廈門、泉州、漳州、潮州這搭佮臺灣隴真相(相同)，民間傳統時行食功夫茶，俗語講"茶食第二泡，某chhōa半老老"，可見閩南人食茶是真講究的，厝內底若有人客來，入門先奉茶，這是咱閩南人熱情好客的表現，閣較是一種對待生活的藝術。