Bi̍t-pô (hàn-jī: 密婆) sī sio̍k-tī Chiroptera chit ê ba̍k ê chhī-leng tōng-bu̍t. Siāng tiōng-iàu ê te̍k-sek tō sī in thaû-chêng-kha pìⁿ-chiâⁿ si̍t (wing), hō͘ in ē-hiáu poe (flight); chhī-leng tōng-bu̍t tō kan-taⁿ bi̍t-pô chiàⁿ-káng ē-hiáu poe; poe-chhí (flying squirrel) kap poe-hù-chhí (Flying possum) kan-taⁿ ē-hiáu chhu-poe (gliding) chi̍t-tè-á hn̄g, m̄ sī chiàⁿ-káng ē poe. Bi̍t-pô ê si̍t thián--khui ná-chhiūⁿ lâng ê chhiú, cheng-chha chéng-thaû-á hām chéng-thaû-á ū phoê-hu liâm--leh, chéng-thâu-á hām sin-khu mā ū.
