Chhian-jī-bûn

Chhian-jī-bûn(千字文) sī chi̍t siú Tiong-kok ūn-bûn, iû Chiu Hing-sū(周興嗣) choān-siá, i tông-sî mā sī choan-bûn the̍h lâi kàu-io̍k tha̍k-chheh gín-á bat-jī ê kàu-châi. Chhian-jī-bûn siōng ti̍k-sû ê só͘-chāi sī i só͘ sú-iōng ê 1000 ê hàn-jī lóng bô-kāng, jî-chhiáⁿ i ta̍k kù iū-koh lóng sī 4 jī.

Chhian-jī-bûn tuì kó͘-chá ê Tang A-chiu kok-ka (chhin-chhiūⁿ Tiong-kok, Tiâu-sián, Ji̍t-pún, Oa̍t-lâm kah Tang-lîng) ê hàn-bûn kàu-io̍k ū chin toā ê íng-hióng. Chhian-jī-bûn chham Sam-jī-king(三字經) kah Pik-ka-sìng(百家姓) sī tha̍k-tsu bat-jī ê ki-chhó͘ hùn-liān kàu-châi.

Chhian-jī-bûn ē-sái iōng bô-kāng ê gí-giân tha̍k-liām, Bân-lâm-gí mā ū Bân-lâm-gí ka-kī ê tha̍k-im.