Hong-kok ê Nausika

Hong-kok ê Nausika (Ji̍t-bûn: 風の谷のナウシカ) sī Ji̍t-pún ang-á-oē-ka, chok-ka kiam tō-ián Miyazaki Hayao só͘ chhòng-chok ê 1 ê tn̂g-phiⁿ ang-á-oē (bàng-gah) siáu-soat, āu--lâi kái-pian chò 1 chhut tiān-iáⁿ (1984 nî). Goân chok-phín tùi 1982 nî kàu 1994 nî tī Tokuma Chu-tiàm (徳間書店) ê Animêzyu(アニメージュ) cha̍p-chì téng-bīn liân-chài.

Tiān-iáⁿ chiūⁿ-chhī liáu-āu Sè-kài Iá-seng-bu̍t Ki-kim (WWF) thui-chiàn lâng khoàⁿ, jīn-ûi tiōng-sī seng-thài.

Kò·-sū

Kò·-sū an-pâi tī "Chhit-ji̍t-hóe" (火の7日間) chit-ê tōa chai-lān hoat-seng liáu-āu 1000 nî. Tē-kiû piáu-bīn iû-goân sī 1 phiàn u-jiám thàu-té ê hòe-hi, téng-bīn khàm 1 têng ū to̍k, seⁿ-ko͘ ê sim-lîm hō-chò "hú-hái" (hukai 腐海). Khun-thiông-lūi khòng-chè hú-hái kap téng-koân ê thiⁿ, kî-tiong siāng-kài tōa ê sī 1 chióng chiat-chiok-tōng-bu̍t hō-chò "ông-thâng" (ômu 王蟲). In khó-pí lâu-á-chhù tōa, gōa-khak tēng-khok-khok, sī hú-hái-kài ê liông-thâu. Kang-gia̍p bûn-bêng í-keng ui--khì, jîn-lūi chhun 1 chhok-á-kiáⁿ, pun chò chē-chē sió-kok oân-ná ha̍p-chok, oân-ná kēng-cheng sio-thâi. Lâng ê chhú-kèng gûi-hiám, chhut-mn̂g tio̍h ha̍h chhùi-am kòe-lut khong-khì, put-koán-sî tio̍h chún-pī hām to̍k-nâ chhia-piàⁿ. Chú-kak Nausika (ナウシカ) sī kî-tiong 1 kok ê kong-chú. Hong-kok (Kaze no tani 風の谷) jîn-bîn hô-pêng siú-kí, in-ūi Hong-kok oá hái, hong thàu, to̍k-nâ pàng--chhut-lâi ê chí bē-tit oá-kīn, hō· in ū thang an-ún kòe lông-gia̍p seng-oa̍h, Nausika siū lâng thiàⁿ-thàng. Chóng--sī hú-hái bô-mê-bô-ji̍t teh seⁿ-thòaⁿ, khok-tōa, kî-thaⁿ ê kok siàu-siūⁿ ū phiat-pō· thiat-té kā húi-bia̍t. Kiông-kok Tolmekia (トルメキア) iá-sim te̍k-pia̍t tōa. Tī chit-ê khám-chām ū 1-ê Pezite-kok (ペジテ) hoat-kiàn 1-ê Chhit-ji̍t-hóe sî-tāi lâu--lo̍h-lâi ê seng-bu̍t bú-khì hō-chò "kī-sîn-peng" (kyosinhei 巨神兵), gōa-hêng chhiūⁿ 1 sian kī-jîn, ū thong-sè-kan bē-pí-tit ê ui-le̍k.

Lēng-gōa ū 1 kok hō-chò Thó͘-kúi Chu-hâu Liân-ha̍p (土鬼諸侯連合) kan-taⁿ tī ang-á-chheh lāi-bīn u chhut-hiān.

Nausika chit ê miâ kin-kù Jit-pún kó͘-tián bûn-ha̍k (堤中納言物語) ê 1-ê thiàⁿ thâng ê kong-chú, kap Hi-lia̍p tn̂g-si The Odessey ê 1-ê kha-siàu. I ê kau-thong kang-khū hō-chò mêve (メーヴェ).