Tâi-tiong-koān (Ji̍t-pún sî-tāi)
Tâi-tiong-koān (臺中縣) sī Tâi-oân tī Ji̍t-pún thóng-tī sî-tāi chho͘-kî (1895 nî ~ 1901 nî) ê chi̍t ê koān-kip ê hêng-chèng-khu.
1895 nî 6 goe̍h 28 hō, ùi Chheng-tiâu thóng-tī sî-tāi bóe-kî ê Tâi-oân-hú kái-chè lâi ê, koán-hat-khu hâm-kài Tâi-oân tiong-pō͘, pau-hâm chit-má ê Biâu-le̍k-koān, Tâi-tiong-chhī, Chiong-hoà-koān, Lâm-tâu-koān kap Hûn-lîm-koān.
1897 nî 5 goe̍h 3 hō, choân Tâi-oân kái-chè chò 6 koān 3 thiaⁿ ê sî, Tâi-tiong-koān ê pak-pō͘ tē-khu pēng-ji̍p sin siat-li̍p ê Sin-tek-koān, ah lâm-pō͘ tē-khu pēng-ji̍p sin siat-li̍p ê Ka-gī-koān, koán-hat-khu kan-na chhun goân-lâi ê tiong-pō͘ tē-khu, pau-hâm chit-má ê Tâi-tiong-chhī, Chiong-hoà-koān kap Lâm-tâu-koān pak-poàⁿ-pō͘.
1898 nî 6 goe̍h 18 hō, 6 koān 3 thiaⁿ koh kái-chè chò 3 koān 3 thiaⁿ, Tâi-tiong-koān khoe-ho̍k goân-pún ê koán-khu.
1901 nî, Tâi-oân kái-chè chò 20 thiaⁿ, Tâi-tiong-koān pī hòe-chí, hun-thiah chò Biâu-le̍k-thiaⁿ, Tâi-tiong-thiaⁿ, Chiong-hoà-thiaⁿ, Lâm-tâu-thiaⁿ kap Táu-la̍k-thiaⁿ 5 ê thiaⁿ-kip ê hêng-chèng-khu.