Tân Éng-hôa

Tân Éng-hôa (Hàn-jī: 陳永華; 1634 nî  – 1680 nî ), sī Tâi-oân Tang-lêng Ông-tiâu ê bûn-bú tāi-sîn, pió-jī Ho̍k-hú (復甫), sè-hō Bûn-chèng (文正).

Tân Éng-hôa ê sîn-siōng.

Tân Éng-hôa tī Ē-mn̂g chhut-sì, in lāu-pē sī Tiong-kok Bêng-tiâu ê kí-jîn Tân Téng (陳鼎). Tân Éng-hôa 15 hòe ê sî-chūn, in lāu-pē tam-jīm Tâng-oaⁿ-koān ê kàu-jū, āu-lâi khì hō Chheng-tiâu kun-tūi sat-hāi. Tī i 23 hòe ê sî-chūn, Tēⁿ Sêng-kong tī Ē-mn̂g kiàn-li̍p chèng-koân. 1656 nî, Tân Éng-hôa keng-iû peng-pō͘ sī-nn̂g Ông Tiong-hàu ê kài-siāu, chiâⁿ-choè Tēⁿ Sêng-kong ê kun-su, siū-hong Chu-gī chham-kun (諮議參軍), Tēⁿ Sêng-kong koh o-ló i "Ho̍k-hú nái kim chi Gō͘-liông" (復甫乃今之臥龍).

Tân Éng-hôa ê hu-jîn sī Âng Siok-cheng (洪淑貞); tī Tâi-oân le̍k-sú sīong, in ê kiáⁿ-jî lóng chin ū miâ-siaⁿ. Tân Éng-hôa tē-2 ê hāu-siⁿ Tân Bōng-kiû (陳夢球) sī Tâi-oân Chheng-tiâu sî-tāi ê tē-it ūi chìn-sū, cha-bó͘-kiáⁿ sī Tang-lêng kàm-kok sè-chú Tēⁿ Khek-chong ê chèng-sek -- Sè-chú-hui Tân--sī (世子妃陳氏).

Āu-sì iâu-thoân Tân Éng-hôa chiū-sī Thian-tē-hōe ê chhòng-li̍p-chiá Tân Kīn-lâm (陳進南), tiāⁿ-tiāⁿ tām hiān-tāi ê bú-hia̍p sió-soat tang-tiong chhut-hiān.