Pang-chān:琉球國

大琉球國 (到17世紀) 大琉球國 うふるーちゅーくく 琉球國 (對17世紀) 琉球國 るーちゅーくく
1429年–1879年
國旗 國王兮家紋
首都	首里城
官方語言	沖繩語
通用語言	琉球語，包括: 沖繩語, 八重山語, 宮古語, 與那國語, 今歸仁語, 奄美語
宗教	琉球神道、日本神道、佛教、儒教、道教
政府	君主制
琉球國中山王
• 1429–1439	尚巴志
• 1477–1526	尚真
• 1587–1620	尚寧
• 1848–1879	尚泰
攝政
• 1666–1673	向象賢
國師
• 1751–1752	蔡溫
立法機構	首里王府, 三司官
歷史
• 統一琉球	1429年
• 己酉倭亂	1609年4月5日
• 予日本滅亡	1879年3月11日
面積
2,271 km2 (877 sq mi)
以前國家 以後國家 北山王國 中山王國 南山王國 大日本帝國
今屬佇	日本

琉球國（沖繩語：ルーチュークク）是一个較早位在東亞兮國家，佇今仔日兮琉球群島。

琉球佇台灣佮日本之間，古早向中國朝貢。1609年，日本兮薩摩藩侵略琉球，強迫琉球也向伊朝貢。1879年，琉球予日本滅亡，改名叫做沖繩縣。毋過今仔日真濟台灣儂猶叫沖繩做琉球。

琉球佮中國福建兮福州關係真深，今仔日福州市兮台江區猶有琉球館（柔遠驛），古早是用來蹛琉球儂兮。

歷史

根據琉球國官方寫兮歷史冊《中山世鑑》、《中山世譜》佮《球陽記事》兮講法，琉球群島是由女神阿摩美久（沖繩語：アマミチュー）所創作兮。後尾阿摩美久兮大囝成做琉球上早兮國王，叫做天孫氏。天孫氏傳15兮國王，予儂篡位，全國大亂。1187年，由浦添兮按司舜天統一琉球。

舜天王朝傳到第三代，讓位予丞相英祖。英祖王朝傳到第四國王玉城兮時陣，琉球分裂出中山，南山佮北山三个國家，佇咧歷史上嘛號做三山時代，玉城獨獨統治最強大兮中山。1349年，中山王西威死了以後，浦添兮按司察度上台。1372年，派儂去明朝朝貢，1392年，明太祖派閩人三十六姓去琉球蹛，幫贊彼搭兮發展。一寡儂著蹛佇久米村遐，對琉球兮外交貢獻真大。

1406年，中山國王武寧予南山兮一个將軍尚巴志趕下台，尚巴志將伊阿爸尚思紹做國王，建立第一尚氏王朝，尚巴志佇1429年滅亡其他兩个國家，統一琉球。

15到16世紀，是琉球兮黃金時代，彼時兮琉球真富，佮中國、朝鮮、泰國等等國家攏有做生理。1469年，國王尚德予大臣尚圓篡位。這尚圓建立第二尚氏王朝。琉球佇尚圓兮囝尚眞手咧最強大，拍下八重山佮宮古島，伊兮囝尚清在位兮時，又拍下奄美群島，這時兮國土面積最大。

日本發動侵略朝鮮兮壬辰倭亂兮時陣，琉球刁持幫讚明朝佮朝鮮。1609年，日本報復琉球，派部隊去拍，將國王尚寧掠去，這代誌就是己酉倭亂。兩年了後，因為驚明朝，將尚寧放轉厝。但是，日本將琉球兮奄美群島奪去，又派兵仔監視伊兮內政，彼時以後琉球實際已經變做日本兮附庸國家矣。

1871年，琉球兮船因為風颱漂到台灣去，坐佇船內面兮儂予台灣原住民刣死。日本借遮代誌拍台灣，迫清國承認這是「保民義舉」。第二年就用這來講清國承認「琉球是日本兮」，單方面將琉球降做家己兮一个籓。琉球國王尚泰派儂去東京抗議，但是日本儂根本無愛插伊。尚泰又閣派儂去清國遐告狀，最後日本儂惱了，佇1879年將琉球滅掉。

彼時陣大部分琉球儂對日本兮統治真不滿，日本兮明治天皇驚𪜶反抗，將尚泰佮伊兮家族攏綁架到東京遐蹛。真濟反對日本兮琉球儂走去中國，有个佇北京，有的佇天津，有个佇福州。𪜶欲想予清國出兵去拍日本，佇總理衙門遐直直講。 1894年甲午戰爭爆發兮時陣，𪜶勸清國拍琉球，毋過清國兮皇帝無聽。

後來聽講清國佮日本發生戰爭，當時反對日本兮琉球儂攏真歡喜，向望清國兮部隊會當拍過來「解放琉球」，結果攏看無著清國伊兮影。最終清國戰敗，將台灣割予日本，琉球獨立也無望矣。來中國兮琉球儂也感覺無望矣，無偌久攏轉厝矣。