Thó-lūn:Hêng-chèng

行政

若依政治學來講, 佇濟濟國家的憲法佮制度-裡，行政是政府的一个權力部份，一般三權分立的制度設計，除去行政，就是司法佮立法這兩个權力分支，行政權所負責-的，是政府逐日的大細項管理的工課。

佇真濟國家內底，見講著"政府"，就是咧指行政部門，總-是這个用法佇國佮國做比較的時，袂免得會引起困擾，根據三權分立的原則，行政權袂使制定法律(立法權)，嘛無資格去做法律的解說(司法權)，行政權干焦有執行法律的權，實務上三權分立佇誠濟國家並無切甲真斬截，較清楚通認出行政權的像徵，是行政權的大頭人，這个頭人，以總統制的國家來看，就是指總統。

佇內閣制的國家-裡，行政權的大頭人四常就是立法權部門(國會)內底上大政黨的領導者，佇這个情況之下，伊是稱做首相較濟，實際的逐个國家對行政權的頭人的稱呼攏無相siâng。

行政部門本身攏會按功能抑任務閣做組織的拆分，比論教育、國防、外交、經濟等等，逐个下層的組織閣會拍派頭人主持。