Chador

Chador (Pho-su-gí: چادر‎‎) sī Pho-su-gí "tōa saⁿ" ê ì-sù, chí chi̍t khoán tōa-moa, it-poaⁿ sī o͘-sek, khàm thâu-mo͘h, sin-ku, ū-sî kiam bīn-bô͘-á, sī liû-hêng tī Iran kap pō͘-hūn Afghanistan, Iraq kap Pakistan téng só͘-chāi ê lú-sèng ho̍k-chong.

Le̍k-sú

Pún khoán saⁿ moa sī Abbasid sît-āi (750 nî kàu 1258 nî) thoân ji̍p Pho-su siā-hōe--ê. 19 sè-kí ê Pho-su thóng-tī-chiá, Shah Nasir al-Din tī 1873 nî hóng-mn̄g Pa-lí liáu-āu, khai-sí tī Pho-su thui-sak Se-iûⁿ ho̍k-chong; chóng-sī kâng sî-tāi ê cha-bó͘-lâng oa-ná kè-sio̍k ū teh chhēng chador.

It-chhù Tāi-chiàn liáu-āu, chū 1925 nî khai-sí sio̍k Reza Khan Pahlavi chú-chhî ê chèng-hú, siū tio̍h tong-sî Thó͘-ní-kî Se-hòa ho̍k-chong chèng-chhek ê éng-hióng, mā tī Iran si̍t-si ho̍k-chong ê Se-hòa kái-kek, chiong thoân-thóng ê Shari’a lu̍t-hoat thè-ōaⁿ chò Hoat-kok-sek ê sè-sio̍k hoat-chè. Siū tio̍h thoân-thóng ê hoán-khòng, tùi lú-sèng ho̍k-chong ê kái-kek siong-tùi khah bān, chóng-sī Iran ê chèng-hú oa-ná tī 1936 nî 2 goe̍h ê sî kìm-chí liáu chador.

1941 nî, Eng-kok kap So͘-liân kun-tūi chiàm-niá Iran, Shah Reza thè-ūi, ōaⁿ chhin-ông Mohammed Reza chú-chèng, i chhú-siau chìn-chêng tùi chador ê hān-chè, m̄-koh tông-sî mā iau-kiû I-su-lân léng-tō-chiá iông-la̍p cha-bó͘ tī kong-chiòng tiûⁿ-ha̍p bô khàm thâu-mo͘ ê chheng-chhah.

Keng-kòe chē tang ê sio-cheⁿ, goân hoán-tùi-phài Ayatollah Khomeini tī 1979 nî khòng-chè chèng-hú í-āu, si̍t-hêng I-su-lân kek-bēng ê chèng-chhek, iau-kiû lú-sèng têng-sin ōaⁿ chhēng chador. Tī 1981 nî ê sî, í Shari’a lu̍t-hoat chò ki-chhó͘ ê sin hoat-lu̍t, iau-kiû só͘-ū 9-hòe í-siōng cha-bó͘-lâng ài chhēng chador he̍k-chiá sī pa̍t chióng hijab khoán ê ho̍k-chong.

Chham-khó

• Beverly Chico (2004). "Chador". Chū Valerie Steele. Encyclopedia of Clothing and Fashion. Charles Scribner's Sons. ISBN 0-684-31394-4. 

Siong-koan

• Hijab