Frédéric Chopin
Frédéric François Chopin (Pho-lân-bûn: Fryderyk Franciszek Chopin; 1810 nî 3 goe̍h 1 ji̍t – 1849 nî 10 goe̍h 17 ji̍t) sī Pho-lân ê chok-khek-ka kiam kǹg-khîm-ka. I sī le̍k-sú siōng siōng ū éng-hióng-le̍k jî-chhiáⁿ iā siōng siū-tio̍h hoan-gêng ê kǹg-khîm chok-khek-ka chi-it; i tông-sî iā sī Pho-lân im-ga̍k le̍k-sú siōng chòe tiōng-iàu ê jîn-bu̍t chi-it. Chopin sī Au-chiu 19 sè-kí lōng-bān-phài im-ga̍k ê tāi-piáu jîn-bu̍t.
Chopin ê pē-bú hun-pia̍t sī Hoat-kok-lâng kap Pho-lân-lâng, i kò-jîn chiâⁿ-si̍t ê chhut-sì ji̍t-kî bo̍k-chêng iû-goân chûn-chāi cheng-gī. Chopin chū sè-hàn chiū chin kah-ì Pho-lân bîn-cho̍k im-ga̍k; i tī 7 hòe ê sî-chūn chiū chhòng-chok liáu Pho-lân bú-khek; 8 hòe sî teng-tâi ián-chhut; 20 hòe bô-kàu chiū í-keng chhut-miâ ah. Chopin tī 39 hòe chiū eng-liân chá-sē, i āu-pòaⁿ-sì-lâng chú-iàu tī Hoat-kok seng-oa̍h; tī hia, i chhòng-chok chhut chē-chē kǹg-khîm chok-phín; pí-lūn-kóng, 4 siú sū-sū-khek, 10-gōa siú Pho-lân bú-khek pau-koat Kun-tūi kap Eng-hiông, 26 siú kǹg-khîm khek-thâu pau-koat Hō͘-tih, 27 siú liān-si̍p-khek pau-koat Lī-pia̍t kap Kek-bēng, 4 pō͘ scherzo, 3 pō͘ kǹg-khîm sonata, chì-chió 22 siú nocturne kap 59 siú mazurka téng-téng. Chopin it-seng ê chhòng-chok chok-phín tōa-pòaⁿ lóng sī kǹg-khîm-khek, in-chhú pī lâng hō-chò kǹg-khîm si-jîn.