Hô Hôa Bûn-gí Lūi-chham

Hô Hôa Bûn-gí Lūi-chham (Hàn-jī: 荷華文語類參; Hô-lân-gí: Nederlandsch-Chineesch Woordenboek met de Transcriptle der Chineesche Karakters in het Tsiang-tsiu Dialekt) sī Gustare Schlegel pian-choān ê Bân-lâm-gí sû-tián, ēng Hô-lân-gí siá ê, tī 1882 nî kàu 1892 nî tiong-kan, iû Hô-lân léng Ìn-tō͘-nî-se-a si̍t-bîn chèng-hú hun chò 4 pún chhut-pán khan-hêng. Chit phō sû-tián m̄-nā sī bo̍k-chiân kui-bô͘ siāng tōa ê Bân-lâm-gí sû-tián, mā sī tē-it phō ēng Se-iûⁿ gí-bûn siá ê Bân-lâm-gí sû-tián. I siu-lo̍k ê Bân-lâm-gí hong-giân sī Chiuⁿ-phó͘ tē-khu ê Chiang-chiu-ōe.

Chit pún chheh chhut-pán ê bo̍k-tek sī beh pang-chō͘ Hô-lân-lâng o̍h Bân-lâm-gí, m̄-sī hō͘ Bân-lâm-lâng o̍h Hô-lân-gí. I siu-lo̍k gí-im í Chiang-chiu-ōe bûn-giân im ûi-chú, ta̍k-ê Hô-lân-gí sû āu-piah lóng ēng Hàn-jī kap Lô-má-jī lâi kái-soeh. Tē-it chheh thâu-chêng ū ka-cho̍k chheng-ūi pió, tē-sì chheh āu-piah ū kok-miâ, siâⁿ-chhī miâ, sio̍k-gí téng hū-lo̍k, í Hô-lân-bûn kap Hàn-bûn hō͘-siong tùi-chiàu, pēng àn Lô-má-jī jī-bó sūn-sī pâi-lia̍t.