Sin-pak Sán-gia̍p Hn̂g-khu

Sin-pak Sán-gia̍p Hn̂g-khu (新北產業園區), khah-chá kiò Gō͘-kó͘ Kang-gia̍p-khu (五股工業區), tī Tâi-oân Sin-pak-chhī Gō͘-kó͘-khu kap Sin-chng-khu, sī Tiong-hôa Bîn-kok Keng-chè-pō͘ Kang-gia̍p-kio̍k só͘ chhòng-pān ê kok-ka-kip kang-gia̍p-khu.

Ūi-tio̍h beh chek-ke̍k hoat-tián kang-gia̍p, chhiok-chìn tē-hng hoân-êng kap hoat-tián, hit-tang-chūn ê Tâi-pak-koān Chèng-hú (taⁿ ê Sin-pak-chhī Chèng-hú) tit-tio̍h Hêng-chèng-īⁿ he̍k-chún, tī 1984 nî 1 goe̍h i-kì Chióng-lē Tâu-chu Tiâu-lē ê kui-tēng, khai-hoat Gō͘-kó͘ Kang-gia̍p-khu. Chi̍t hong-bīn iông-la̍p jī-têng so͘-hông-tō ê ha̍p-hoat kang-tiûⁿ thiah-chhian-hō͘ sú-iōng, chi̍t hong-bīn thê-kiong heng-pān kang-gia̍p jîn chò-ûi kiàn-chhiúⁿ iōng-tē, lâi so͘-kái kang-gia̍p iōng-tē ê su-kiû. Chhú-gōa, hit-tang-chūn ê Tâi-pak-koān Chèng-hú tī chit-ê kang-gia̍p-khu lāi siat-li̍p liáu Kang-siong Tián-lám Tiong-sim, thê-kiong chi̍t ê kok-chè-kip tián-lám tiûⁿ-tē hō͘ chāi-tē ê chhiúⁿ-siong. 2011 nî 4 goe̍h iû Sin-pak-chhī Chhī-tiúⁿ Chu Li̍p-lûn chhut-bīn hia̍p-tiau, tī hit-nî 6 goe̍h chhe 1 kái-miâ Sin-pak Sán-gia̍p Hn̂g-khu.

Sin-pak Sán-gia̍p Hn̂g-khu ê sán-gia̍p chióng-lūi kóng-hoàn, kí-hoân si̍t-phín, pháng-chit, ka-kū, ìn-soat, sok-hòa, tiān-chú, ki-hāi téng-téng lóng-chóng ū, iōng-tē chha-put-to oân-choân khai-hoat oân-pit, sin-chìn chhiúⁿ-siong chi̍t tē lân kiû. M̄-koh, chòe-kīn cha̍p tang, in-ūi sán-gia̍p choán-hêng kap gōa-î iân-kò͘, hân-tì thó͘-tē ko-ta̍t 45.92 kong-khéng, siong-tong î 2 chō Tāi-an Sim-lîm Kong-hn̂g, 5 chō Tōa Kī-tàn.