So Ji-sub (소지섭, 1977/11/04 tshut-sì) sī tsi̍t uī Lâm Hân tsa-poo ián-uân. Tsò gû-á-khòo ê model liáu-āu, i khai-sí tshut-miâ, tsiām-tsiām piàn-sîng tiān-sī-kio̍k ê lâm-tsú-kak. I ián-tshut kuè tiān-sī-kio̍k I'm Sorry, I Love You, Cain and Abel, Phantom kah Master's Sun, iáu-koh ū tiān-iánn Rough Cut. So Ji-sub mā bat huat-hîng kuè hip-pop EP.

So Ji-sub.

Sing-pîng siu-kái

Tsiàu So Ji-sub i ka-kī ê kóng-huat, i siàu-liân sî-tsūn sī tsi̍t ê tsin pì-sù ê gín-á; sóo-í, i kā ka-kī hùn-liān sîng tsi̍t uī tsuan-gia̍p ê siû-tsuí suán-tshiú. I kóng ka-kī ē piàn-sîng bîng-tshenn, uân-tsuân sī ì-guā. I pún-lâi ē siūnn beh tsò model, tsí-sī siūnn kóng ē-sái kah hip-pop kua-tshiú Kim Sung-jae kìnn tsi̍t bīn niā-niā, bô siūnn kàu suah tī 1995 nî hōo lâng suán tsò STORM gû-á-khòo huē-siā ê model. Suà--lo̍h-khì, i koh tsham-ka hí-kio̍k Three Guys and Three Girls kah tiān-sī-kio̍k Model ê ián-tshut. Iáu-m̄-koh, siong-tuì kāng-khuán huē-siā ê Song Seung-heon huat-tián liáu tsin sîng-kong, i suah bô-siánn-mih sîng-kó, tsí ē-tàng ián tsi̍t-kuá sió kak-sik. It-ti̍t kàu 2002 nî ián-tshut tiān-sī-kio̍k Glass Slippers ê phuè-kak liáu-āu, i tsiah khai-sí siū-tio̍h tiōng-sī.

Tsū 2004 nî khai-sí, i tsiām-tsiām tián-hiān tshut i ê ián-hì tsâi-lîng, tī What Happened in Bali ián-tshut phuè-kak. I siūnn kóng ka-kī ing-kai ē kè-sio̍k án-ne tsò hú-tsōo-hîng ián-uân; m̄-koh, i keh-tńg-nî tī I'm Sorry, I Love You ián-tshut pi-kio̍k jîn-bu̍t, hong-tōng Hân-kok kah tsuân A-tsiu. I āu-lâi mā piáu-sī kóng i ka-kī kám-kak tsit nn̄g tshut sī i ián-hì sing-gâi tiong, siōng hó ê hì-kio̍k tsok-phín. 2004 nî kàu 2007 nî, i khì tsò-ping. Tsò liáu ping, i huê-kui ián-gē sū-gia̍p, liâm-mi ián-tshut Jang Hoon tō-ián ê tiān-iánn Rough Cut. In-uī i tâu-tsu tsi̍t tshut ka-kī ê tiān-iánn, sóo-í tuā-bē liáu-āu thàn beh-tsió tsînn.

2009 nî, So Ji-sub khai-sí tâu-ji̍p Ji̍t-pún kah Tiong-kok ê ián-gē tshī-tiûnn, hun-pia̍t ián-tshut GeGeGe no Kitaro 2: Kitaro and the Millenium Curse kah Sophie's Revenge nn̄g tshut hì-kio̍k. I liâm-mi koh tńg-khì Hân-kok ián-tshut Cain and Abel. 2010 nî, So Ji-sub huat-piáu i ê siòng-phìnn ji̍t-kì So Ji-sub's Journey; tī tsit pún ji̍t-kì tang-tiong, kì-lo̍k i ka-kī tshut-tō 13 tang í-lâi sóo huat-sing kuè ê tuā-sè hāng tāi-tsì. Iû tsit pún ji̍t-kì, ē-sái liáu-kái pîng-siông-sî tsin pì-sù ê i, tī bô-kāng sî-kî sim-lāi ê tsióng-tsióng kám-siū. Tī Gangwon tō, ū īng i ê miâ hō-miâ ê So Ji-sub lōo. Sin-uî tsi̍t ê hip-pop ê ài-hònn-tsiá, So Ji-sub mā ū huat-piáu kuè EP. 2013 nî, So Ji-sub ián-tshut gî-sîn-gî-kuí ê tiān-sī-kio̍k Master's Sun.