Lông-bîn Tóng (Tâi-oân)
Lông-bîn-tóng, 1989 nî 2 goe̍h chhe 3 sêng-li̍p kàu taⁿ ê Tâi-oân sió chèng-tóng. Chèng-tī oá to̍k-phài. Chú-se̍k Tiuⁿ Bêng-hián (張銘顯) kóng tóng-oân 6-chheng-gōa-ê.
Li̍p-tiûⁿ kap chú-tiuⁿ
siu-kái- Jīn-ûi Tiong-kok in-ūi lōe-chiàn bo̍k-chêng sī hun-lia̍t chōng-hóng, èng-kai àn-chiàu 2-ê Tek-kok ê bô·-sek, hō·-siong sêng-jīm tùi-hong ê léng-thó·, ah bī-lâi 2 pêng chèng-tī keng-chè tiâu-kiāⁿ sio-siâng ê sî-chūn, chū-jiân tō-ē thóng-it. Lông-bîn-tóng ê "Tiong-kok" bô pau-koah Tâi-oân-tó kap Phêⁿ-ô·, in-ūi in jīm-ûi Tâi-oân tī 1895 nî tō í-keng sêng-li̍p Tâi-oân Bîn-chú-kok, chiàn-āu Ji̍t-pún hòng-khì Tâi-oân, só·-í Tâi-oân sio̍k-î chit-ê Bîn-chú-kok ê léng-thó·. Hiān-tāi ê Tiong-hôa Bîn-kok ê léng-thó· kan-taⁿ pau-koah Kim-mn̂g.
- Jīn-ûi "tī Tâi-oân chhut-seⁿ--ê tō-sī Tâi-oân-lâng", Tâi-oân "chū-kó·-bû-kok", nā-chún ū chó·-kok, èng-kai kóng thóng-tī kòe Tâi-oân ê kok-ka lóng-sī chó·-kok (2005 nî Soán-kí Kong-pò).
- Jīn-ûi chèng-hú èng-kai pó-chiong lông-bîn ê ki-pún-só·-tek, bē-tàng in-ūi WTO soah lâi hòng-khì lông-sán-gia̍p, kiâⁿ lông-sán-phín chìn-kháu ê lō·.
- Chi-chhî khoân-pó lí-liām ji̍p-hiàn.
- Jīn-ûi siu-hiàn èng-kai "kok-chè-hòa".
- Chàn-sêng pài Ji̍t-pún Yasukuni Sîn-siā (靖国) ê 30,308-ê Ji̍t-pún-chek Tâi-oân peng-á, mā bat chhōa thoân khì pài-pài kúi-nā-pái.
Chham-ú soán-kí
siu-káiLông-bîn-tóng bat phài lâng chham-ka Ka-gī-koān, Chiong-hòa-koān chit 2 ūi ê li̍p-úi kap kok-tāi soán-kí, bô tiâu. Tiuⁿ Bêng-hián āu--lâi chham-soán 2005 nî ê kok-bîn-tāi-hōe tāi-piáu soán-kí, kiat-kó the̍h tio̍h 15,516 tiuⁿ phiò (0.4%), thang oāⁿ 1 se̍k. Che sī chit tóng sêng-li̍p kàu taⁿ î-it 1 pái cheng-chhú tio̍h bîn-ì tāi-piáu ê se̍k-chhù.
Chham-khó chu-liāu
siu-kái- 2005 nî kok-tāi soán-kí siau-sit (Tâi-oân Ji̍t-pò)
- Chhú-siau khì Yasukuni Sîn-siā pài-pài ê oa̍h-tōng (Tāi-kì-goân/Tiong-iong-siā)
- Tiong-iong Soán-kí Úi-oân-hōe, 2005 nî Kok-bîn-tāi-hōe Tāi-piáu Soán-kí Soán-kí Kong-pò.