Phài-chhut-só͘
Phài-chhut-só͘ (派出所), sī siōng-kài ki-chân ê kéng-chhat ki-kò͘, mā ē-sái chí i só͘-chāi ê kiàn-tio̍k. Phài-chhut-só͘ tāi-pō͘-hūn sī tē-hng kéng-chhat-kio̍k só͘ siat-li̍p, hat-khu ê hoān-ûi thong-siông bē chiok tōa, tī to͘-chhī khó-lêng sī kúi-nā tiâu lō͘, nā-sī tī chng-kha só͘-chai khó-lêng tio̍h sī chi̍t ê chng-thâu. Chi̍t ê phài-chhut-só͘ lāi-té ê kéng-chhat jîn-oân thong-siông m̄ chē, mā bô choan-bûn ê khu-liû-só͘, cheng-sìn-sek téng-téng ê siat-si, sīm-chì ū khó-lêng ēng it-poaⁿ ê pâng-keng lîm-sî khu-liû jîn-hoān.
Ji̍t-pún siu-kái
Ji̍t-pún tī 1874 nî tiàm Tang-kiaⁿ siat-li̍p "Kōban"(Ji̍t-gí: 交番), 1881 nî kái-miâ chò "Hashutsujo"(Ji̍t-gí: 派出所), pēng-chhiáⁿ tī choân-kok kok-tē siat-tì. 1994 nî koh ùi Hashutsujo kái tńg-khì Kōban. Tī kok-lāi ki-tiûⁿ, gōa-kok chù Ji̍t-pún tāi-sài-koán, tiōng-iàu koaⁿ-oân koaⁿ-tí téng só͘-chāi só͘ siat-tì ê kéng-chhat siat-si, kiò-chò Keibihashutsujo(Ji̍t-gí: 警備派出所).
Tâi-oân siu-kái
Tī Tâi-oân ê kéng-chèng thé-hē tang-tiong, kéng-chhat hun-chù-só͘ (hàn-jī: 分駐所) kah phài-chhut-só͘ sī khîn-bū chip-hêng ê ki-kò͘, hū-chek kèng-khîn-khu ê kui-ōe, khîn-bū chip-hêng kah tok-tō[1].
Kéng-chhat-kio̍k àn-chiàu jîn-kháu, bīn-chek hun-pò͘ chêng-hêng kah tī-an su-kiû, siat-tì hun-kio̍k, ē-kha koh siat-li̍p phài-chhut-só͘. Nā hiong, tìn, chhī, khu kah kî-thaⁿ ê tē-khu liân-ha̍p siat-li̍p, jî-chhiáⁿ bô jīm-hô hun-kio̍k, tio̍h siat-li̍p hun-chù-só͘ tòng-chò hia ê chòe-ko chip-hêng khîn-bū tan-ūi, thong-siông pian-chè ē pí phài-chhut-só͘ tōa, tān kî-si̍t nn̄g ê ūi-kai sio-kâng.
Hân-kok siu-kái
Hân-kok (hit-chūn iá-koh sī Ji̍t-pún thóng-tī) tī 1924 nî ê Kiaⁿ-siâⁿ (tio̍h-sī chit-má ê Seoul) khai-siat phài-chhut-só͘ (Hân-gí: 파출소). Hiān-tāi Hân-kok ê gōa-khîn-sek phài-chhut-só͘ hun-lūi ū saⁿ chióng:
- Tē-khu tūi: phài-chhut-só͘ kái-chò tē-khu-tūi, hū-chek chiu-piⁿ tī-an. Koán-hat siú-to͘-khian kah tē-hng to͘-chhī.
- Phài-chhut-só͘: koán-hat lio̍k-tē lāi-lio̍k, phian-phiah tē-khu kah tó-sū tē-khu.
- Chhut-tiuⁿ-só͘: gōa-khîn-sek kéng-chhat-só͘ tang-tiong siōng ki-chân cho͘-chit, koán-hat tó-sū, phian-phiah lio̍k-tē he̍k-chiá soaⁿ-khu, hū-chek it-poaⁿ phài-chhut-só͘ ê gia̍p-bū.