Pang-chān:臺灣兮行政區

Chit phiⁿ bûn-chiuⁿ ū Pe̍h-ōe-jī ê pán-pún.
Chham-khó chit phiⁿ bûn-chiuⁿ ê Pe̍h-ōe-jī pán-pún.

臺灣

概況

臺灣主題

臺灣兮行政區對荷蘭佮西班牙統治時期開始，西班牙儂捌佇北臺灣設置過3个省（provincia）。現今主要根據中華民國政府兮相關法律規定，劃分一个省（臺灣）、六个直轄市（臺北、新北、桃園、臺中、臺南、高雄），其中臺灣省下跤統轄11个縣佮3个市。

這馬兮行政區

地圖	No.	名	統轄	行政中心	面積（km²）		人口	首長
地圖	No.	名	統轄	行政中心	陸域	海域	人口	首長
1 2 4 5 6 7 8 9 3 10 11 12 13 14 15 16 17 18 19 20	省
	-	臺灣	3市 11縣	南投	25110.0037	40837.0399	6,918,402	無
	直轄市
	1	臺北	12區	信義	271.7997	0	2,493,210	蔣萬安
	2	新北	29區	枋橋	2052.5667	2966.7265	4,047,112	侯友宜
	3	桃園	13區	桃園	1220.9540	1,130.2383	2,336,764	張善政
	4	臺中	29區	西屯	2214.8968	1,663.7394	2,858,958	盧秀燕
	5	臺南	37區	安平新營	2191.6531	2,592.7310	1,858,873	黃偉哲
	6	高雄	38區	苓雅鳳山	2951.8524	2,726.8354	2,731,891	陳其邁
	縣市
	7	基隆	7區	中正	132.7589	3,585.4177	361,497	謝國樑
	8	新竹	3區	北區	104.1526	387.5623	457,328	邱臣遠（代理）
	9	嘉義	2區	東區	60.0256	0	262,365	黃敏惠
	10	新竹	1市 3鎮 9鄉	竹北	1427.5369	333.9971	594,181	楊文科
	11	苗栗	2市 5鎮 11鄉	苗栗	1820.3149	1,741.4762	533,063	鍾東錦
	12	彰化	2市 6鎮 18鄉	彰化	1074.3960	3,313.6481	1,226,560	王惠美
	13	南投	1市 4鎮 8鄉	南投	4106.4360	0	472,727	許淑華
	14	雲林	1市 5鎮 14鄉	斗六	1290.8326	1,220.4274	658,831	張麗善
	15	嘉義	2市 2鎮 14鄉	太保市	1903.6367	336.1701	479,129	翁章梁
	16	屏東	1 chhī 3 tìn 29 hiong	屏東	2775.6003	5,771.4292	789,706	周春米
	17	宜蘭	1市 3鎮 8鄉	宜蘭	2143.6251	2,145.3078	449,254	林姿妙
= 直轄市 =（省轄）市 =（省轄）縣	18	花蓮	1市 2鎮 10鄉	花蓮	4628.5714	2,790.9131	315,581	徐榛蔚
	19	臺東	1市 2鎮 13鄉	臺東	3515.2526	11,274.6894	210,272	饒慶鈴
	20	澎湖	1市 5鄉	媽宮	126.8641	7,936.0015	107,908	陳光復

臺灣省

詳細請看：臺灣省

臺灣省目前由中華民國政府行政院管轄。根據2000年《中華民國憲法增修條文》兮規定，「省」不再是地方自治團體，省政府由地方自治團體兮行政機關轉型做中央政府兮派出機關，成做「虛級省」。臺灣省劃做11个縣佮3个市，臺灣省政府設佇南投縣南投市兮中興新村。2018年7月，省級機關去任務化，所以對2018年開始中華民國着無省主席這个職位矣。

直轄市

詳細請看：直轄市（中華民國）

直轄市是地方自治團體，直接隸屬佇行政院，人口聚居達125萬儂以上，閣佇政治、經濟、文化佮都會區域發展上，有特殊需要兮地區，通好設置直轄市。直轄區下跤分設區，區兮下跤閣有設里，里兮下跤閣有設鄰。

目前臺灣有臺北、新北、桃園、臺中、臺南、高雄等六个直轄市。

縣

詳細請看：縣（中華民國）

縣佇1998年精省進前捌屬佇省政府，這馬看業務，分別受區域聯合服務中心佮行政院各部會駐中部辦公室管轄。縣兮下跤有設置鄉、鎮佮市。

目前臺灣有11个縣

市

詳細請看：市（中華民國）

市和縣仝級，舊法規內叫做「省轄市」；精省前捌隸屬佇省政府，這馬看業務，分別受行政院各部會駐中部辦公室佮區域聯合服務中心管轄。人口聚居達50萬以上未滿125萬儂，閣佇政治、經濟佮文化上地位重要兮地區通好設置市。市兮下跤閣有設區，區兮下跤閣有設里，里兮下跤閣有設鄰。

目前臺灣有基隆、新竹佮嘉義等三个市。

鄉、鎮、市、區

詳細請看：鄉（中華民國）、鎮（中華民國）、縣轄市佮區（中華民國）

鄉、鎮、縣轄市、區是4種行政位階相仝抑相𫝛兮行政區名號。鄉、鎮、縣轄市是縣下跤兮劃分，是地方自治團體，有𪜶家己兮首長選舉、民意機關、自治財源等。法規規定人口聚居達10萬以上未滿30萬儂，閣工商業發達、自治財源冗剩、交通利便佮公共施設完全兮地區，通好設置縣轄市；對鄉佮鎮無規定設立兮標準。區是直轄市抑是市下跤兮劃分，毋是自治團體，行政首長由所屬市長指派，無民意機關。

目前臺灣攏總有368个鄉、鎮、市佮區：146鄉、38鎮、14縣轄市、170區。

歷史佮沿革

東寧時代

1664 nî liáu-āu ê Tang-lêng hêng-chèng-khu

詳細請看：臺灣東寧時代兮行政區

1661年鄭成功占領南臺灣，5月佔普羅民遮城，改赤崁做東都明京，總地號名東都。設置一个府佮兩个縣，以新港溪（今兮鹹水溪）做分界，北爿屬佇天興縣、南爿屬佇萬年縣；另外設置一司叫澎湖安撫司。鄭成功過身了後，𪜶後生鄭經改東都做東寧，閣佇承天府頂面設一个東寧總制府。另外閣共天興縣佮萬年縣升格做天興州佮萬年州。除了原底兮澎湖安撫司，閣加設北路安撫司佮南路安撫司。基層行政區兮部份，承天府下跤有四个坊佮一个鎮，天興州下跤有13个里，萬年州有11个里，安撫司下跤有4个社統治原住民。

清朝時代

詳細請看：臺灣清朝時代兮行政區

臺廈道時期

清朝康熙年間共臺灣納入中國版圖了後，設立了臺廈道，和廈門合做伙，也隸屬佇彼當陣兮福建省。臺灣島方面，設一个府佮三个縣。總管廈門佮臺灣兮臺廈道道署設佇廈門，啊臺灣府設佇臺南。基層行政區沿襲東寧時代，各縣下跤劃分堡里鄉澚，統轄下跤兮自然村等級兮街庄社鄉。

1684年（康熙23年）臺廈道下跤設一府三縣：新港溪（今兮鹹水溪）北爿是諸羅縣、新港溪佮二仁溪中間是臺灣縣，二仁溪南爿是鳳山縣。1723年（雍正元年）臺廈道下跤設一府四縣：共諸羅縣兮虎尾溪北爿加設彰化縣。

臺灣道時期

1727年（雍正5年）臺廈道兮臺灣府部份正式和廈門分離，成立臺灣道，道署設佇臺灣縣，^[1]設一府四縣兩廳。1731年（雍正9年）彰化縣佇大甲溪北爿兮部份歸屬佇淡水廳。1787年（乾隆52年）平定林爽文起事了後，共諸羅縣改做嘉義縣。1811年（嘉慶16年）加設噶瑪蘭廳。

1875年（光緒元年）分北部做臺北府，管轄宜蘭縣、基隆廳、淡水縣、新竹；臺灣府管轄臺灣縣、嘉義縣、鳳山縣、彰化縣、澎湖縣、恆春縣、卑南廳、埔里社廳；臺灣道攏總設兩府八縣五廳。

福建臺灣省時期

1885年（光緒11年）臺灣建省，設一道兩府八縣五廳。1887年（光緒13年）臺灣才獨立設省，因為和福建省閣有部份行政業務，所以官方正式名稱號做福建臺灣省，毋過一般叫分開了後兮臺灣「臺灣省」；建省後兮省城選佇原彰化縣橋仔圖，今兮臺中市，省城所在設臺灣府佮臺灣縣，啊原來兮臺灣府改叫臺南府，原來兮臺灣縣改叫安平縣；全省攏總設1道3府11縣3廳1直隸州。1894年（光緒20年）臺北府加設南雅廳，閣共省廳徙去臺北府淡水縣，臺灣成做3府11縣4廳1直隸州。

日本時代

1926年到1945年臺灣一級行政區圖

詳細請看：臺灣日本時代兮行政區

臺灣日本時代兮行政區，攏總經歷10改更動。其中照劃分兮方式分做三个時期，對1895年兮三縣一廳開始，漸漸佇縣佮廳兮數目頂增減；落尾佇1901年共縣廢除，全臺設20兮廳；8年後，變12个廳；最後佇1920年改做五州二廳。

縣、廳時期

日本猶未接收時就已經規劃欲共臺灣原來兮三府改做三縣，原三縣下跤兮縣、廳改做支廳；另外，原本和府仝級兮臺東直隸州降級做臺南縣下跤兮支廳，也共澎湖廳升格做和縣仝級兮澎湖島廳，臺南府兮嘉義縣改做佇臺灣縣下跤兮支廳。實際開始接收後因為遭遇着反抗，臺灣佮臺南兩个縣無法度實施，所以暫時用派出性質兮民政支部，支廳暫時用出張所。1896年平定臺灣各地反抗了後，共原規劃實施，其中臺灣民政支部改名做臺中縣，伊下跤兮嘉義出張所改轉去由臺南縣統轄。

1897年共全臺改做6縣3廳：臺北縣、新竹縣、臺中縣、嘉義縣、臺南縣、鳳山縣、宜蘭廳、臺東廳、澎湖廳，廢除支廳，改做辨務署，全臺攏總有78个辨務署；原清朝時代兮堡里鄉澚也漸漸失去行政區兮功能，成做地籍、戶籍兮區劃單位；1898年因為財政困難，共六縣改倒轉三縣，辦務署縮減做39个，澎湖、臺東兩廳个辦務署改做出張所。落尾辦務署漸漸縮減，到1900年賰24个。1901年恆春廳對臺南縣獨立出來，也共宜蘭、恆春兩廳下跤兮辦務署改做出張所。

廳制時期

1901年底廢除三縣，共伊下跤兮辦務署升格做廳（部份有整併），全臺加上原本兮四廳攏總20廳。原本廳下跤兮出張所也廢除，全臺改做廳下跤統轄支廳，支廳下跤和街庄社鄉之間設置輔助行政機關區。1904年完成全臺土地調查，自然村等級兮街庄社鄉予大量整併，成做有界線兮行政村。1909年共20廳併做12廳，也共區改做正式兮行政區。

州、廳時期

1920年共除了花東兩廳以外兮所在實施和日本內地兮縣類似兮州制，州下跤有郡佮市，郡下跤有街佮庄，市街庄下跤有大字，有兮大字下跤閣有小字；全臺灣攏總有五州兩廳：臺北州、新竹州、臺中州、臺南州、高雄州、臺東廳、花蓮港廳。此外，也正式共蕃地劃入管轄。

1926年高雄州澎湖郡升格做澎湖廳；1937年花東兩廳也實施郡、市、街、庄兮制度。

會當注意兮是，頭前幾改區域兮變動相當頻繁，逐改存在兮時間攏無長，啊1920年這擺兮區域劃分所持續兮時間上長，也相當程度影響着戰後中華民國政府規劃臺灣行政區。

戰後臺灣

1949年行政區重劃前，臺灣省行政區圖

1982~2010年兮臺灣行政區（含金門佮馬祖）

1945年8月31號，頒佈《臺灣省行政長官公署組織大綱》。9月1號，臺灣省行政長官公署佇重慶成立臨時辦公處。9月20號，正式公佈《臺灣省行政長官公署組織條例》。10月25號，臺灣省行政長官公署開始佇臺灣運作。
1945年，臺灣省行政長官公署分設八个縣（臺北、新竹、臺中、臺南、高雄、花蓮、臺東、澎湖），九个省轄市（基隆、臺北、新竹、臺中、彰化、嘉義、臺南、高雄、屏東）佮兩个縣轄市（宜蘭、花蓮）。
1947年4月22號，行政院會議決議撤掉臺灣省行政長官公署，改做臺灣省政府。
1948年，東沙島佮南沙太平島改隸屬佇海南特別行政區。
1949年，臺北縣北投鎮、士林鎮獨立直屬佇草山管理局。
1950年8月，臺灣省劃做臺北、基隆、臺中、臺南、高雄等五个省轄市，佮臺北、宜蘭、桃園、新竹、苗栗、彰化、臺中、南投、臺南、嘉義、雲林、高雄、屏東、臺東、花蓮、澎湖等16个縣，草山管理局佇3月代先改名做陽明山管理局。仝年區署廢止，鄉鎮直接隸屬佇縣下跤。
1956年，臺灣省政府原來位佇臺北市，徙去到南投縣中興新村辦公。
1967年，臺北市改做直轄市，1968年納入臺北縣北投、士林（陽明山管理局）、內湖、南港、梘尾、木柵六个鄉鎮。
1973年7月，共臺中縣和平鄉所管轄兮梨山、平等兩个村設立梨山建設管理局。
1974年1月，陽明山管理局撤掉。
1979年7月，高雄市改做直轄市，同時高雄縣小港鎮歸予高雄市。另外，原屬佇海南特別行政區兮東沙群島、南沙太平島佮中洲礁由高雄市代管。
1981年3月，梨山建設管理局撤掉併入臺中縣。
1982年7月，新竹、嘉義兩縣轄市升格做省轄市；共原來屬佇新竹縣兮香山鄉，歸予新竹市，改做香山區。
1998年12月，省政府精省計畫實施。
2007年10月1號，臺北縣準用部分直轄市規定。
2010年12月25號，新北市（原臺北縣）、臺中市（原臺中縣市合併）、臺南市（原臺南縣市合併）、高雄市（原高雄縣市合併）等四个直轄市成立。
2011年1月1號，桃園縣準用部分直轄市規定。^[2]
2014年12月25號，桃園市（原桃園縣）直轄市成立，行政區變做6个直轄市、3个市、13个縣。

無實現兮區域草案

1945年3月

詳細請看臺灣接管計劃綱要地方改制

臺灣接管計劃綱要地方政制兮行政規劃圖，黃底是省轄市

省轄市	一級縣	二級縣	三級縣
臺北基隆宜蘭新竹臺中彰化臺南爽文高雄屏東花蓮港梧棲	羅東，縣治羅東七星，縣治汐止淡水，縣治淡水桃園，縣治桃園員林，縣治員林北港，縣治北港曾文，縣治新營延平，縣治新化鳳山，縣治鳳山	省三，縣治瑞芳中壢，縣治中壢滄海，縣治新埔竹南，縣治竹南福星，縣治苗栗大甲，縣治大甲豐原，縣治豐原霧峰，縣治霧峰鹿港，縣治鹿港北斗，縣治北斗南投，縣治南投斗六，縣治斗六清芳，縣治民雄東石，縣治朴子北門，縣治佳里淵亭，縣治岡山東港，縣治東港鳳林，縣治鳳林	恆春，縣治恆春澎湖，縣治媽宮臺東，縣治臺東

1945年8月

1945年8月中央設計局規劃兮臺灣省行政區草案

省轄市	縣
臺北基隆新竹臺中嘉義臺南高雄	淡水，縣治淡水基隆，縣治基隆宜蘭，縣治宜蘭枋橋，縣治枋橋桃園，縣治桃園新竹，縣治新竹竹南，縣治竹南苗栗，縣治苗栗豐原，縣治豐原大屯，縣治臺中彰化，縣治彰化北斗，縣治北斗	南投，縣治南投斗六，縣治斗六嘉義，縣治嘉義新營，縣治新營麻豆，縣治麻豆豐化，縣治新化岡山，縣治岡山鳳山，縣治鳳山恆春，縣治恆春臺東，縣治臺東花蓮，縣治花蓮港澎湖，縣治媽宮

1947年6月

這時兮無實現計畫，共臺灣分設做11縣5省轄市。計畫中兮縣市名稱佮現行名稱對照如下：

桃園市 → 新竹縣
新竹縣 → 長風縣
苗栗縣→竹南縣
臺中縣→豐原縣
臺中市→中正市
彰化縣→臺中縣
雲林縣→長溪縣
臺南市→成功市

1949年

1950年7月

1950年7月臺灣省行政區重劃草案

1997年

1997年中華民國行政區重劃計畫圖，無仝色是無仝省份，紅色是直轄市。

由行政院研究發展考核委員會所發表兮無實現計畫，共中華民國自由地區當時兮兩省（臺灣、福建）兩市（臺北、高雄）重新劃做六省三市一特區。另外，縣市級行政區方面也做出相當兮調整。

規劃兮行政區		對應兮原有行政區
省級	縣級	對應兮原有行政區
北基省	基隆市	基隆市加上臺北縣兮汐止市、瑞芳鎮、平溪鄉、雙溪鄉、貢寮鄉。
	北一縣	三重市、新莊市、蘆洲市、淡水鎮、五股鄉、林口鄉、三芝鄉、石門鄉、八里鄉、金山鄉、萬里鄉。
	北二縣	枋橋市、土城市、樹林市、鶯歌鎮、三峽鎮。
	北三縣	中和市、永和市、新店市、深坑鄉、石碇鄉、坪林鄉、烏來鄉。
臺北市		臺北市（無變）。
桃苗省	桃一縣	桃園市、八德市、大溪鎮、龜山鄉、蘆竹鄉、大園鄉、復興鄉。
	桃二縣	中壢市、平鎮市、楊梅鎮、龍潭鄉、觀音鄉、新屋鄉。
	新竹縣	新竹市、新竹縣。
	苗栗縣	苗栗縣（無變）。
中投省	臺中縣	豐原市、東勢鎮、大甲鎮、清水鎮、沙鹿鎮、梧棲鎮、后里鄉、神岡鄉、潭子鄉、大雅鄉、新社鄉、石岡鄉、外埔鄉、大安鄉、大肚鄉、龍井鄉、和平鄉。
	彰一縣	彰化市、鹿港鎮、和美鎮、線西鄉、伸港鄉、福興鄉、秀水鄉、花壇鄉、芬園鄉、大村鄉、埔鹽鄉。
	彰二縣	員林鎮、溪湖鎮、田中鎮、北斗鎮、二林鎮、埔心鄉、永靖鄉、社頭鄉、二水鄉、田尾鄉、埤頭鄉、芳苑鄉、大城鄉、竹塘鄉、溪洲鄉。
	南投縣	南投縣（無變）。
臺中市		臺中市加上臺中縣兮大里市、太平市、霧峰鄉、烏日鄉。
嘉南省	雲林縣	雲林縣（無變）。
	嘉義縣	嘉義縣、嘉義市。
	南一縣	新營市、鹹水鎮、白河鎮、麻豆鎮、佳里鎮、學甲鎮、柳營鄉、後壁鄉、東山鄉、下營鄉、六甲鄉、官佃鄉、大內鄉、西港鄉、七股鄉、將軍鄉、北門鄉。
	南二縣	永康市、新化鎮、善化鎮、新市鄉、安定鄉、山上鄉、玉井鄉、楠西鄉、南化鄉、左鎮鄉、仁德鄉、歸仁鄉、關廟鄉、龍崎鄉。
	臺南市	臺南市（無變）。
高屏省	高一縣	鳳山市、林園鄉、大寮鄉、大樹鄉、大社鄉、仁武鄉、鳥松鄉。
	高二縣	岡山鎮、旗山鎮、美濃鎮、橋頭鄉、燕巢鄉、田寮鄉、阿蓮鄉、路竹鄉、湖內鄉、茄萣鄉、永安鄉、彌陀鄉、梓官鄉、六龜鄉、甲仙鄉、杉林鄉、內門鄉、茂林鄉、桃源鄉、三民鄉。
	屏東縣	屏東縣（無變）。
	澎湖縣	澎湖縣（無變）。
高雄市		高雄市（無變）。
花東省	宜蘭縣	宜蘭縣（無變）。
	花蓮縣	花蓮縣（無變）。
	臺東縣	臺東縣（無變）。
金馬特別行政區	金門縣	金門縣（無變）。
金馬特別行政區	馬祖縣	連江縣。
註1：北基省、桃苗省、中投省、嘉南省、高屏省、花東省等六个省份兮名攏未定。註2：北一縣、北二縣、北三縣、桃一縣、桃二縣、彰一縣、彰二縣、南一縣、南二縣、高一縣、高二縣等11兮縣份兮名攏未定。

參考文獻

引用

↑ 劉寧顏編，《重修臺灣省通志》 Archived 2006-09-11 at the Wayback Machine.
↑ 100年元旦桃園縣升準直轄市

來源

冊

劉寧顏編：《重修臺灣省通志》，臺北市：臺灣省文獻委員會，1994年。
施亞軒：《臺灣的行政區變遷》，臺北：遠足文化出版社，2003年。

[1] 劉寧顏編，《重修臺灣省通志》 Archived 2006-09-11 at the Wayback Machine.

[2] 100年元旦桃園縣升準直轄市

[1]

[2]